உயர் ரத்த அழுத்தத்தால் ஏற்படும் பாதிப்புகளும், இயற்கை தீர்வுகளும்

ஹெல்த் & லைஃப்ஸ்டைல்
Updated Oct 04, 2019 | 11:38 IST | Times Now

உயர் ரத்த அழுத்தத்தை கட்டுப்படுத்தவில்லை என்றால் ரத்த குழாய்களுக்கு பாதிப்பு ஏற்படுவதுடன் இருதய நோய்கள் ஏற்படும் ஆபத்தும் உள்ளது.

High Blood Pressure, உயர் ரத்த அழுத்தம்
உயர் ரத்த அழுத்தம்  |  Photo Credit: Getty Images

புது டெல்லி: ரத்த அழுத்தம் ஆரோக்கிய அளவைக் கடந்து அதிகரிக்கும் போது உயர் ரத்த அழுத்தம் ஏற்படுகிறது. உயர் ரத்த அழுத்தம் ஏற்படும் போது சில நேரங்களில் அறிகுறிகள் தெரிந்தாலும் பல நேரங்களில் அறிகுறிகள் ஏதும் தென்படுவதில்லை.

உயர் ரத்த அழுத்தத்தை கட்டுப்படுத்தவில்லை என்றால் ரத்த குழாய்களுக்கு பாதிப்பு ஏற்படுவதுடன் இருதய நோய்கள் ஏற்படும் ஆபத்தும் உள்ளது. தலைவலி, மயக்கம், சீரற்ற இதயத்துடிப்பு, நெஞ்சுவலி மற்றும் உயர் ரத்தக் கொழுப்பு உள்ளிட்ட உபாதைகளும் வரக்கூடும்.

உயர் ரத்த அழுத்தம் எதனால் ஏற்படுகிறது என்பதற்கு சரியான காரணங்கள் தெரியவில்லை என்றாலும் உணவில் அதிக உப்பு எடுத்துக்கொள்வது, அதிகமாக மது அருந்துதல், மன உளைச்சல், மரபியல், தைராய்டு ஆகியவை உயர் ரத்த அழுத்தம் ஏற்பட காரணிகளாக அமையலாம்.

உயர் ரத்த அழுத்தத்தால் உடலுக்கு ஏற்படும் பாதிப்புகள்

ரத்த குழாய்கள் சேதமடையும்
அரோக்கியமான ரத்த குழாய்கள் நெளிந்து சுருங்கும் தன்மை கொண்டது. உயர் ரத்த அழுத்தம் ஏற்பட்டால் ரத்த குழாயின் உட்புறத்தில் உள்ள உயிரணுக்கள் சேதமடையும்.

இருதய பாதிப்புகள்
உடல் முழுவதற்கும் ரத்தத்தை அனுப்பி வைப்பது இதயம். உயர் ரத்த அழுத்தத்தால் இதயத்தின் சுமை அதிகரிக்கிறது. இதனால் இருதய தசைகள் வலுவிழக்கின்றன.

மூளை பாதிப்புகள்
உயர் ரத்த அழுத்தத்தால் மூளைக்கு செல்லும் ரத்த குழாய்களில் ரத்தம் கட்டி அடைப்பு ஏற்பட வாய்ப்புள்ளது.

சிறுநீரக பாதிப்புகள்
உயர் ரத்த அழுத்தம் உடையவர்களுக்கு ரத்த குழாய்களில் அதிக ரத்தம் செல்வதால் சிறுநீரகத்தில் உள்ள ரத்த குழாய்கள் பாதிக்கப்படும்.

கண்களுக்கும் பாதிப்பு
கண்களுக்கு செல்லும் ரத்த ஓட்டம் பாதிக்கப்பட்டு ரத்த கசிவு ஏற்படலாம் அல்லது பார்வையிழக்கவும் நேரலாம்.

உயர் ரத்த அழுத்தத்தை கட்டுப்படுத்தும் உணவுகள்

  1. கேரட்: கேரட்டுகளில் நார்ச்சத்து மற்றும் வைட்டமின் A சத்து இருப்பதால் பச்சையாக கேரட் சாப்பிடுவதன் மூலம் ரத்த அழுத்தத்தை குறைக்கலாம்.
  2. தக்காளி: வைட்டமின் E மற்றும் ஆண்டி-ஆக்சிடண்ட் உள்ளதால் உயர் ரத்த அழுத்தத்தை கட்டுப்படுத்த தக்காளி உதவும்.
  3. டார்க் சாக்கலேட்: ஸ்ரோக் ஏற்படும் வாய்ப்பை குறைத்து, நல்ல கொழுப்பை அதிகரிக்க செய்து கெட்டக் கொழுப்பை குறைக்கும் வல்லமை கொண்டது டார்க் சாக்கலேட்.
  4. இளநீர்: மக்னீசியம் மற்றும் எலக்ட்ரோலைட் கொண்ட இளநீர், ரத்த அழுத்தத்தை குறைப்பதுடன் இதய ஆரோக்கியத்திற்கு உற்ற துணை புரிகிறது.

பொறுப்புத் துறப்பு: மேற்கண்ட பரிந்துரைகள் அனைத்தும் பொது பயன்பாட்டிற்கானவை. அவை யாவும் மருத்துவ ஆலோசனையாக கருதக் கூடாது. உணவு பழக்கங்களில் மாற்றங்கள் செய்யும் முன் உங்கள் மருத்துவர் அல்லது ஊட்டச்சத்து நிபுணரின் ஆலோசனைகளைப் பெறுங்கள்.

NEXT STORY
loadingLoading...
loadingLoading...
loadingLoading...